ကြက်အစာ စပ်ခြင်း

ကြက်အစာ စပ်ခြင်း (နည်းသစ်စွယ်စုံ ဆိုဒ်မှကူးယူဖော်ပြသည်)

အချိုးညီအစာသည် တိရိစ္ဆာန်တစ်ကောင် တစ်နေ့အတွက် (၂၄-နာရီအတွက်) လိုအပ်သော အစာ များကို အချိုးအစားနှင့် ဦးရေ (အရေအတွက်)အလိုက် စနစ်တကျတွက်ချက်၍ရောစပ်ထားသော အစာဖြစ် သည်။  အစာစပ်ရာတွင် တွက်ချက်ရန် လွယ်ကူသောနည်းကို  ဦးစားပေးရ မည်။ အစာရောစပ်ခြင်းကို မစမီ တွင် စိတ်တွင်း၌  တိရစ္ဆာန် အရွယ်အစား အမျိုးအစားနှင့် သဘာဝများပေါ် မူတည်၍ လက်ရှိအခြေအနေအရ မိမိတို့မှ စီစဉ်ကွပ်ကဲ ကျွေးမွေးနိုင်မည့် အမျိုးအစားကိုရွေးချယ်ရမည်။

အစာရောစပ်ရာတွင် လိုအပ်သော အသားဓာတ်၊ ကစီဓာတ်နှင့် အခြားအရေအတွက် အမျိုးအစားများ အပြင် အောက်ပါအချက်များကို အထူး အဓိကထား၍ စဉ်းစား ဆောင်ရွက်ရန် လိုသည်။

1. အစာသည် တိရစ္ဆာန်အကြိုက် (စား၍ကောင်းသော၊ အရသာတွေ့ သောအစာ) ဖြစ်ရမည်။
2. အစာသည် ဈေးသက်သာ၍ ရေရှည်တွင်  တွက်ခြေကိုက်ရမည်။ တတ်နိုင်ပါက မိမိခြံ၊ လယ်ယာထွက်     ကုန် သီးနှံပစ္စည်းများ) ကိုသာ သုံးစွဲရန် ဖြစ်သည်။
3. အစာတွင်ပရိုတင်း(အသားဓာတ်)ကိုလိုအပ်သရွေ့သာပါစေရမည်။(၎င်းတို့သည် အထူးဈေးနှုန်းကြီးမား     သောကြောင့် ဖြစ်သည်။)  ဈေးကြီးသော ပစ္စည်းကိုသုံးစွဲခြင်းဖြင့် အခြားသောအဖြည့်ခံအစာများတွင် ဗီတာမင်များ ခြိုးခြံရသမျှဖြင့်     မမျှမတ ဖြစ်နိုင်သည်။
4. အစာအတွက် လိုအပ်သော ဗီတာ မင် အပြည့်အစုံ၊ အလုံအလောက်ပါ စေရမည်။
5. အစာတွင် လိုအပ်သောဓာတ်ဆားများ(Minerals)အပြည့်အစုံ၊အလုံအလောက်ပါစေရမည်။ (ဓာတ်ဆား ပိုမိုပါဝင်ခြင်းဖြင့် မလိုလားအပ်သော ပြသနာ ဖြစ်နိုင်၍ မများအောင် ရှောင်ပါ။)
6. အစာအတွက်လိုအပ်သော အဖြည့်ခံဆေးများ (Feed Additive Antibiotic) စသည်များ အပြည့်အစုံ ပါဝင်စေရမည်။
7. အစာသည် ကြေညက်လွယ်ရ မည်။
8. အစာသည် တတ်နိုင်သမျှ သန့်ရှင်းလတ်ဆတ်ပြီး ကျွေးရန်သင့်လျော်ရပေမည်။

အစာစပ်ယူမည့် အစာကြမ်းတွင် ပရိုတင်းဓာတ် ရာခိုင်နှုန်း အချိုးအစား မည်မျှထည့်ရန် လိုအပ် သည်ကို တွက်ချက်ယူရန် အထူးအရေးကြီးပါသည်။ ဤနေရာတွင် ပရိုတင်းရာခိုင်နှုန်းများ သိရှိထားရမည်။  ပြောင်းတွင် ပရိုတင်း (၈) ရာခိုင် နှုန်းမှ (၁၀) ရာခိုင်နှုန်းရှိသည်။ သို့သော် ကြက်စာအတွက် အမှန် လိုအပ်သော ပရိုတင်းမှာ (၂၀) ရာခိုင်နှုန်းဖြစ်သည်။  ထို့ကြောင့် ပြောင်း (၇၀) ရာခိုင် နှုန်းတွင် ပုဇွန်ဖွဲ (၃၀) ရာခိုင်နှုန်း ရောစပ်ပေးသော် ပျမ်းမျှအားဖြင့် ပရို တင်းဓာတ် (၂၀) ရာခိုင်နှုန်းဖြစ်လာနိုင် ပါသည်။

ထိုနည်းတူစွာပင် ဆန်ကွဲတွင် (၈) ရာခိုင်နှုန်း၊ ဖွဲနုတွင် ပရိုတင်း (၁၃) ရာခိုင်နှုန်း အသီးသီးရှိသည်ကို မှတ်သား လျက် ပြောင်း၊ ဆန်ကွဲ၊ ဖွဲနု စသည်တို့ ရောစပ်ရပေမည်။  ယင်းအစာများမှာ ကာဘိုဟိုက်ဒရိတ် (ကစီ) ဓာတ်များပြီး ဗီတာမင်နှင့် သတ္တုဓာတ်ပေါများသော အစား အစာများကို ထပ်မံဖြည့်စွက်ရပေမည်။

ငါးမှုန့် (သို့) ပုဇွန်ဖွဲကို လိုအပ်သော အချိုးအစားအလိုက် ထည့်သွင်းရောစပ် ပါက သင့်လျော်ပါမည်။ ဥပမာအားဖြင့်—

ဆန်ကွဲ	၂၃ ပေါင်
ဖွဲနု	၁၁ ပေါင်
ပြောင်း	၄၄ ပေါင်
	၇၈ ပေါင်

ပုဇွန်(သို့)ငါးမှုန့်	၁၁ ပေါင်
ပဲဖတ်	၅ ပေါင်
နှမ်းဖတ်	၆ ပေါင်
	၂၂ ပေါင်

ယင်းတို့ကို စုပေါင်းရောစပ်သော် (၁၀ဝ) ပေါင် ရရှိမည် ဖြစ်သည်။ ကြက်စာကို စပ်ရာတွင် စရိတ်စက ကုန်ကျမှုကို ကြည့်၍၊ ကြက်စာကို ဈေးပေါပေါနှင့် ရအောင် မပြုသင့်ပေ။ ဥပမာ – ပရိုတင်းဓာတ်ပါသော အစာချင်းအတူတူ ဈေးကြီးသောငါးနှင့် ပုဇွန်ဖွဲတို့ကို သုံးမည့်အစား၊ ဈေးပေါသော နှမ်းဖက်၊ ပဲဖတ်များချည်း သုံးရန် မသင့်လျော်ပေ။ အဘယ်ကြောင့်ဆို သော် ပဲဖတ်၊ နှမ်းဖတ် တို့သည် ပရိုတင်း ဓာတ်ရှိသော်လည်း ငါးမှုန့်၊ ပုဇွန်၊ ဖွဲတို့လောက် အာဟာရဓာတကြွယ်ဝပြည့်စုံခြင်း မရှိသည်ကို သတိချပ်သင့်သည်။

ငွေကြေးကုန်ကျသက်သာမှု တစ်ခုတည်းကိုသာကြည့်ရှု၍ ရောစပ်ခြင်း ဖြင့်၊ ကြက်များတွင် အာဟာရ ဓာတ်ချို့တဲ့ကာ ကျန်းမာရေး ထိခိုက်စေနိုင်ပါ သည်။   ပူပြင်းသောနွေရာသီတွင် ဗီတာမင်ဓာတ်ချို့တဲ့ တတ်သဖြင့် ဖြည့်စွက်ပေးသည့်အနေဖြင့် ဗီတာမင် ပါသော အစာများရောနှော ကျွေးသင့်ပါသည်။

ကြက်ဥထွက်နှုန်းနှင့် အစာအဟာရ

ကြက်ဥထွက်နှုန်းနှင့် ကြက်တို့ အတွက် အစာအဟာရမှာ ဆက်စပ်နေပါသည်။ ဥပမာအားဖြင့် ကြက် (၁၀ဝ) ကောင် မွေးမြူထားပါက၊ ယင်းကြက် (၁၀ဝ)ဥသော ကြက်ဥနှင့် ၎င်းတို့ကိုကျွေးသော ကြက်စာဖိုး ကုန်ကျမှုနှင့် တိုက်ရိုက်ဆက်သွယ်နေသည်။  ကြက်များ၏ဥထွက်နှုန်းများပြားလာလေ၊ ကြက်ဥထုပ်လုပ်ရသည့်ကုန်ကျစရိတ် နည်းလာလေ ဖြစ် သည်။ ထိုသို့ ကြက်ဥထွက်နှုန်း များပြားလာရန်လည်း ကြက်စာတွင် လိုအပ်သော အာဟာရဓာတ်များ ပြည့်ဝ စွာ ပါဝင်စေရန်လိုအပ်ပါသည်။

ကြက်ပေါက်နှုန်းနှင့် ကြက်စာ

ပရိုတင်း(အသားဓာတ်နည်းပါးသောအစာတနည်းအားဖြင့် ၁၂ ရာခိုင်နှုန်းထက်နည်းပါးသော) ကြက်စာ များသာစားရသည့် ကြက်မှဥသော ကြက်ငယ်ကလေးများ ပေါက်ဖွားစံချိန်လျော့နည်းလာတတ်သည်။  ခြုံ၍ဆိုရလျှင် ကြက်စာတွင် ဖေါ်ပြခဲ့ပြီးသော သတ္တုဓာတ်များ၊ ဗီတာမင်ဓာတ်များ၊ ပရိုတင်း (အသား ဓာတ်)များစသည့် အာဟာရဓာတ်များကြက်များတွင် လိုအပ်သည့်အချိုးအစားအတိုင်းပါရှိစေရန် ဂရုစိုက်သင့် ပါသည်။

အထက်တွင် ဖေါ်ပြခဲ့သော ဗီတာမင်ဓာတ်ချို့တဲ့လျှင် ဖြစ်တတ်သောအချက်အလက်များကို ဂရုပြုသင့် ပါသည်။

အသားစားကြက်များအတွက် အစာ အာဟာရ ကျွေးမွေးခြင်း

အသားတိုး ကြက်မျိုးများသည် ဥစားကြက်မျိုးများထက် ကြီးထွားနှုန်းမှာ နှစ်ဆခန့်အထိ လျင်မြန် သဖြင့်၊ ထိုကြီးထွားနှုန်းအတွက် ပြည့်စုံလုံလောက် မည့်အဟာရဓာတ် လိုအပ်ပေသည်။ အသားတိုးကြက်စာ တွင် ဥစားကြက်စာ ထက် အင်အားဓာတ် (energy) နှင့် အဆီဓာတ် (fat) ပါဝင်နှုန်း မြင့်မားရမည်။

ပရိုတင်း (အသားဓာတ်)ပါဝင်နှုန်းမှလည်းမြင့်မားရမည်။ ထို့ပြင် ဗီတာမင်နှင့် သတ္တုဓာတ် ပါဝင်နှုန်းမှာ လည်း ပြည့်စုံမြင့်မားရပေမည်။ သို့သော် အမျှင်ဓာတ် (Fibers) မှာမူ နည်းပါးရမည်။

ဖွဲနု	၂၀ ပေါင်  (သို့ ) ပိဿာ
ဆန်ကွဲ	၂၇ ပေါင်
ပြောင်း	၁၀ ပေါင်
	၅၇ ပေါင်

ပဲဖတ်၊ နှမ်းဖတ်	၂၅ ပေါင်
ငါးခြောက်	၁၅ ပေါင်
ခရု	၂ ပေါင်
ဖြည့်စွက်စာ	၁ ပေါင်
	၄၃ ပေါင်

အသားတိုးကြက်စာကို အထက်ပါစပ်နည်းဖြင့် ကြက်ငယ်မှ ရောင်းသည်အထိ ကျွေးနိုင်သည်။ ကြီးထွား နှုန်းမြန်ခြင်းကြောင့် ဗီတာမင်နှင့် သတ္တုဓာတ်များပါဝင်သော ဖြည့်စွက်စာကို အစာတွင် အပြည့်အဝထည့်သွင်း ရန် လိုအပ်ပါသည်။

-   အသားတိုးကြက်များမှာအစာကို အဆက်အပြတ်စားသောက်တတ်ခြင်းကြောင့် မပြတ်လပ်စေရန် ဂရုပြု သင့်သည်။

-   အစာစိမ်းကျွေးပါက အစာစိမ်းစားနှုန်းများပြီး အစာနုစားနှုန်းလျော့ကျခြင်းကြောင့် အစာကိုမပြတ်လပ် စေရန် ဂရုပြုသင့်သည်။

-   အစာစိမ်းကျွေးပါက အစာစိမ်းစားနှုန်းများပြီး အစာနုစားနုန်းလျော့ကျခြင်းဖြင့် အလေးချိန်တိုးနှုန်း လျော့နည်းသွားတတ်သည်။

-   အစာကို ဥကြက်မများတွင်ကျွေးသကဲ့သို့ အတုံးအခဲမဖြစ်စေအောင်ဂရုစိုက်ရမည်။ တစ်နည်းဆိုရသော် အစာမှာ မှုန့်ရမည် ဖြစ်သည်။

-   အစာအဟာရလိုအပ်ချက်နှင့် ကြက်၏အရွယ်၊အချိုးနှင့်ရာသီဥတုအလိုက် အနည်းနှင့် အများကွာခြားမှု ရှိလေသည်။

အစာပုံသဏ္ဌာန်

အစာပုံသဏ္ဌာန်မှာ  အမှုန့် (mash) အတောင့် (pellet) နှင့် အတောင့်တို့ကို ပြန်၍ ကြိတ်ခွဲထားသော (crumble) ဟူ၍ သုံးမျိုးသုံးစားရှိသည်။  အတောင့်ကျွေးခြင်းဖြင့် အစာစားသုံးမှု မြင့်တက်စေခြင်း၊ ကြက်စာ၏အရည်အသွေးကို တိုးတက် စေခြင်း၊ အစာလေလွင့်မှုမရှိ လျော့ကျစေခြင်း၊ အစာမှုန့်ထက် စားသောက်ရန်လွယ်ကူခြင်း၊ အချို့သော အဆီ တွင် ပျော်ဝင်သည့်ဗီတာမင်များ လျင်မြန်စွာပျက်စီးမှုနည်းပါးခြင်း၊ အချို့သောဗက်တီးရီးယားနှင့်အချို့ ဗိုင်းရပ်စ် ပိုးများ အစာအတောင့် (Pelletting) ပြုလုပ်စဉ် ပျက်စီးသွားနိုင်ခြင်းစသည့် အကျိုးကျေးဇူးများ ရရှိစေသည်။

သို့သော် ယင်းသို့အစာတောင့် ကျွေးခြင်းသည် ကုန်ကျစရိတ်ပိုစေ သည်။ ရေသောက်သုံးမှု ပိုစေသည်။ ၎င်းးတို့မှ စွန့်ထုပ်သော အညစ်အကြေးမှပျော့သည်။ တစ်ကောင်နှင့် တစ်ကောင်ဆိတ်ခြင်းကို တိုးတက်စေ သည်။

အစာထဲတွင်ထည့်ကျွေးသင့်သော အခြားပစ္စည်းများ

အစာထဲတွင် ခရု (Oyster shell) ကို ဖြည့်စွက်စာအဖြစ် ထည့်ကျွေးသင့်သည်။ အထူးသဖြင့် ဥကြက် များ၏ အစာတွင် ဥခွံထူအောင်နှင့် အရည်အသွေးကောင်းအောင် ခရုကို ထပ်မံထည့်ကျွေးရမည်။ ၎င်းတွင် ကယ်လ်ဆီယမ် (၃၈) ရာခိုင်နှုန်း ပါဝင်သည်။  ထို့ပြင်အစာထဲတွင် ကျောက်ခဲသေး(Gret)ထည့်ကျွေးသင့်သည်။ ၎င်းမှာ နေ့တိုင်းကျွေးရန် မဟုတ်ပေ။ ယင်းသို့ကျွေးခြင်းဖြင့် အစာကြေညက်မှုကို ပို၍ဖြစ်စေသည်။ တွဲလွဲချအစာခွက်တစ်ခုတွင် တစ်ပတ်မှာ ကြက် ၁၀ဝ ကောင်အတွက် (Grit)  ၁ ပေါင် (၄၅၄ ဂရမ်) ကျွေးနိုင်သည်။

ဒေါက်တာမြမြဌေး